धादिङ- यस वर्षको माध्यमिक शिक्षा परीक्षा (एसईई) आजदेखि शुरू हुँदैछ।बिहान ८ बजेदेखि देशभरका दुई हजार ७९ परीक्षा केन्द्रबाट एकैसाथ परीक्षा शुरू हुन लागेको हो।
धादिङमा २४ परीक्षा केन्द्रबाट ५ हजार ४ सय ७५ विद्यार्थी सहभागी हुँदैछन् ।
२७ गतेसम्म सञ्चालन हुने यस वर्षको एसइई परीक्षामा धादिङमा सामुदायिक र संस्थागत विद्यालय गरी ५ हजार ४ सय ७५ विद्यार्थी सहभागी हुने शिक्षा विकास तथा समन्वय इकाई धादिङका प्रशासकीय प्रमुख भुमीलाल शर्मा सुवेदीले जानकारी दिनुभयो।
सुवेदीका अनुसार धादिङको १ सय ३४ सामुदायिक विद्यालय र २० संस्थागत विद्यालयबाट नियमिततर्फ ४ हजार ३ सय ४७, प्राविधिकतर्फ १ सय ६४, ग्रेड वृद्धितर्फका ९ सय ३२ र खुल्ला तर्फ ३२ जना विद्यार्थी सहभागी हुनेछन्।
जिल्लाभर २४ परीक्षा केन्द्रमा २४ जना केन्द्राध्यक्ष, ४३ जना सहायक केन्द्राध्यक्ष, २ सय ७५ जना निरीक्षक, ५६ जना परीक्षा सहायक,३ सय ६० जना सुरक्षाकर्मी र ११० जना सहयोगी कर्मचारी गरी जिल्लाभर ८ सय ७५ जना जनशक्ती प्रत्यक्ष परिचालन गरिएको प्रशासकीय प्रमुख सुवेदीले बताउनुभयो।
परीक्षा स्वच्छ, निष्पक्ष र मर्यादित रूपमा सञ्चालन हुने उहाँको भनाई छ।
यसवर्षको परीक्षामा देशभर पाँच लाख १४ हजार ७१ विद्यार्थी सहभागी हुने राष्ट्रिय परीक्षा बोर्ड, परीक्षा नियन्त्रण कार्यालयले जनाएको छ ।
परीक्षामा एक सय ५० जनासम्म परीक्षार्थी भएको केन्द्रमा एक जना सहायक केन्द्राध्यक्ष हुने छन् भने २० जना विद्यार्थी बराबर एक जना निरीक्षक खटिने भएका छन्।
परीक्षामा ७५ जनाभन्दा कम परीक्षार्थी भएको केन्द्रमा सहायक केन्द्राध्यक्ष नराखिने जनाइएको छ ।परीक्षा बिहान ८ देखि बिहान ११ बजेसम्म सञ्चालन हुनेछ।
राष्ट्रिय परीक्षा बोर्ड, परीक्षा नियन्त्रण कार्यालयले ढुक्क र निर्धक्क भएर परीक्षामा सहभागी हुन विद्यार्थीहरुलाई आग्रह गरेको छ।
लेटर ग्रेडिङ प्रणालीमै यसवर्ष पनि परीक्षाको नतिजा सार्वजनिक गर्ने तयारी गरिएको छ।
धादिङ आवाज डट कम - विकास विचार र ताजा समाचारको स्वतन्त्र खुराक
