धादिङ । गंगाजमुना गाउँपालिकामा सञ्चालन भैरहेको उत्थानशील जीविकोपार्जन तथा सुदृढ खाद्य सुरक्षा (रिलिफ) परियोजनाको स्थलगत अनुगमन गरिएको छ।
प्रयत्नशील सामुदायिक विकास समाज प्रयास नेपालले आड्रा नेपालको सहयोग तथा गाउँपालिकाको समन्वयमा सञ्चालन भईरहेको परियोजनाको आईतबार गाउँपालिका, सहयोगि संस्था आड्रा नेपाल र सञ्चारकर्मीहरुको समूहले अनुगमन गरेको प्रयास नेपालका फिल्ड संयोजक पवन प्याकुरेलले जानकारी दिनुभयो।
अनुगमनका क्रमका विभिन्न कृषि तथा पुपालन समूहमा निर्माण भएको बाख्राको खोर, जलवायु उत्थाशील कृषि नर्सरी, लैंगिक समनता तथा सामाजिक समावेशीकरण र समूह परिचालनमा भएका कामहरु हेरिएको थियो।
किसानहरुले परियोजना राम्रो रहेको र परम्परागत रुपमा गर्दै आएको कृषि प्रविधिलाई जलवायु उत्थानशील प्रविधिमा रुपान्तरण गर्दा उत्पादनमा वृद्धि भएको अनुगमन समूहलाई जानकारी गराएका थिए।
अनुगमनका क्रममा गंगाजमुना गाउँपालिकाका उपाध्यक्ष रामेश्वर सिम्खडाले गाउँपालिका पनि कृषि क्षेत्रको विकासमा काम गरीरहेको बताउँदै सहयोगि हातको रूपमा परियोजनाले धेरै सहयोग गरेको बताउनुभयो। उपाध्यक्ष सिम्खडाले आगामी दिनमा पनि यस्तै सहयोगको अपेक्षा गर्दै गाउँपालिका सहकार्य गर्न प्रतिवद्ध रहेको बताउनुभयो।
किसानहरुसंग कुरा गर्दै उपाध्यक्ष सिम्खडाले नयाँ र जलवायु उत्थानशील कृषि प्रविधिलाई अवलम्वन गरेर आय आर्जन बढाउन र जलवावायु परिवर्तनको असरलाई कम गर्ने कार्यमा सहयोग गर्न आग्रह गर्नुभयो।यसका लागि गाउँपालिका पनि किसानलाई सहयोग गर्न दृढ रहेको उहाले बताउनुभयो।
अनुगमनका क्रममा आज वडा नं। ३, ४ र ५ मा गठन भएका विभिन्न कृषि तथा पशुपालन समूहले गरेका कामहरु हेरिएको पनि फिल्ड संयोजक प्याकुरेलले जानकारी दिनुभयो।
अनुगमनमा गाउँपालिकाका उपाध्यक्ष सहित निमित्त प्रमुख प्रशासकीय अधिकृत बद्रिनाथ पौडेल, ५ नं वडा अध्यक्ष कुमार अधिकारी, ४ नं वडा अध्यक्ष प्रेम बहादुर घले, ३ नं वडा अध्यक्ष राजकुमार गुरुङ, कृषि तथा पशुसेवा शाखाका प्राविधिकहरू, प्रयास नेपालका अध्यक्ष विरबहादुर तामाङ, आड्रा नेपालका कार्यक्रम अधिकृत दिलिपचन्द्र ढकाल, परियोजनाका विभिन्न जिम्मेवारीका कर्मचारीहरु र सञ्चारकर्मीहरुको सहभागिता रहेको थियो ।
अनुगमनमा किसानहरुसंग परियोजना सञ्चालनको एक वर्षमा भएका कामहरु, समस्या र चुनौतिहरु बारे छलफल भएको थियो। रिलिफ परियोजना यहि रुपमा खनियाबास गाउँपालिकामा पनि सञ्चालन भैरहेको प्रयास नेपाल धादिङले जनाएको छ।
धादिङ आवाज डट कम - विकास विचार र ताजा समाचारको स्वतन्त्र खुराक
