धादिङ ।खनियाबास गाउँपालिकाका किसान समूहलाई उपहार प्रदान कार्यक्रम अन्तरगत बाख्रा र बाख्राको खोर प्रदान गरिएको छ।
खनियाबास गाउँपालिका र हेफर इन्टरनेशनल नेपालको सहयोगमा ग्रामीण आपसि विकास (आरएमडि) धादिङले सञ्चालन गरेको कृषि तथा पशु विकासमा आधारित साना किसान तथा युवा उद्यमशीलता कार्यक्रम अन्तर्गत बुधबार उपहार प्रदान कार्यक्रम भएको हो।
स्थानीय समुदायको आर्थिक सशक्तीकरण तथा दिगो विकासलाई प्रोत्साहित गर्ने उद्देश्यले उक्त कार्यक्रम आयोजना गरिएको ग्रामीण आपसि विकासका कार्यकारी संयोजक शेरबहादुर भण्डारीले जानकारी दिनुभयो।
कार्यक्रममा २ सय ८१ कृषक परिवारलाई बाख्रा तथा ६२ कृषक परिवारलाई बाख्राको खोर उपहार स्वरूप प्रति खोर १५ हजार रुपैयाँ प्रदान गरिएको थियो।
कार्यकारी संयोजक भण्डारीका अनुसार मुल समूह समिति (दिदि समूह)बाट उप समूह समिति (बहिनी समूह) लाई प्रदान गरिएको हो ।
उपहार प्रदान कार्यक्रमका प्रमुख अतिथि पूर्व कानून, न्याय तथा संसदिय मामिला राज्य मन्त्री दिलमान पाख्रिनले उपहार हस्तान्तरण गर्दै यस कार्यक्रमले गरिबी निवारण, महिला सशक्तीकरण र कृषि व्यवसाय प्रवर्द्धनमा महत्वपूर्ण योगदान पुर्याइरहेको बताउनुभयो।
उहाँले सहभागी कृषकहरूलाई सहयोगको सही सदुपयोग गर्न अनुरोध गर्दै भविष्यमा अझ सशक्त परिणाम प्राप्त गर्न सबै पक्षहरूको सहकार्य आवश्यक रहेको पनि बताउनुभयो।
लाभान्वित कृषकहरूले हेफर नेपालको सहयोगले आफ्नो आर्थिक अवस्था सुधार गर्न ठूलो टेवा पुग्ने विश्वास व्यक्त गरेका छन्।
कार्यक्रममा खनियाबास गाउँपालिकाका उपाध्यक्ष सेक्केमान तामाङ, सबै वडाका वडा अध्यक्षहरु, स्थानीय सरकारका प्रतिनिधि, सरोकारवालाहरू, हेफर नेपालका पदाधिकारी तथा स्थानीय कृषकहरूको उल्लेखनीय सहभागिता रहेको थियो। आयोजकहरूले आगामी दिनमा पनि यस्ता कार्यक्रमलाई निरन्तरता दिँदै सामुदायिक समृद्धि र आत्मनिर्भरता बढाउने लक्ष्य राखिएको बताएका छन् ।
कार्यक्रम अन्तरगत खनियाबासमा व्यावसायिक बाख्रा पालनसंगै प्लाष्टिक घरमा तरकारी खेति, अकबरे खुर्सानी खेती र जलवायु अनुकूलन कृषि प्रणालिका कामहरु भैरहेका छन् ।
२०७८ सालबाट शुरु भएको कार्यक्रम पहिलो चरणमा २०८० साल असार १६ गते सकिएको थियो । अहिले दोश्रो चरणमा २०८० पुस २१ देखी २०८३ असार १६ सम्म सञ्चालन हुने ग्रामीण आपसि विकासका कार्यकारी संयोजक भण्डारीले बताउनुभयो।
कार्यक्रम सञ्चालनका लागि खनियाबास गाउँपालिकाले ७० प्रतिसत र हेफर परियोजनाले ३० प्रतिशत लगानी गरेको छ।
कार्यक्रम सञ्चालन अवधिदेखि हालसम्म गाउँपालिकाले २ करोड ५५ लाख ६२ हजार ६ सय ५७ रुपैयाँ बजेट खर्च गरिसकेको छ भने किसानहरुले कृषि तथ पशुजन्य वस्तु विक्रिबाट करिव ७ करोड रुपैयाँ आम्दानी गरेको गाउँपालिकाको तथ्यांकमा उल्लेख गरिएको छ।
पछिल्लो सर्भेक्षण अनुसार २ हजार ९ सय घरधुरी रहेको गाउँपालिकामा लक्षित घरधुरी २ हजार ४८० भएको र हाल यो कार्यक्रम २२ सय घरधुरीमा पुगि सकेको छ।
२७२ घरधुरीमा मौसमी बसाईसराई, छरिएका बसोबास र ज्येष्ठ नागरिक भएकाले पुग्न नसकिएको कार्यकारी संयोजक भण्डारीले बताउनुभयो।
धादिङ आवाज डट कम - विकास विचार र ताजा समाचारको स्वतन्त्र खुराक
